النهاردة هنكلمكم عن تاني أهم بند لازم يتأسس له صح جدا , لأن الغلطة فيه بفورة ,,, وممكن لا قدر الله يعمل مشكله فيما بعد ف تلف الأجهزة أو حدوث حريق لا قدر الله ,
قبل ما نتكلم في بند الكهرباء ,,, لازم تكون عارف انتا هتفرش إيه وفين ؟
مكان السرير هيكون فين ؟؟ مكان الكنبه ؟؟ مكان التليفزيون … هتعمل تليفزيون في اكتر من أوضة ولا لأ , التكييفات اللى هتجيبها كام حصان ؟؟ هتعمل أباليك ولا لأ ؟ وفين اماكنها ؟؟ هتعمل جيبسو بورد ولا لأ ؟؟ ,,, لأن كل اجابة للأسئلة ديه هيتحدد حاجات كتير ,,, ازاي يعني ؟؟ هفهمك ,,,,,,,,,,,, ركز بقي أوي
*لو هتعمل سرير ف أوضة , الطبيعي ان الكهربا بتاعتهم تكون شمال ويمين السرير ,, عشان لو انتا نايم وعايز تشحن موبايلك ,, تنور الاباجورة … وهكذا
* لو هتحط كنبه ؟ هتحطها فين ؟؟ عشان على اساس اجابتك هيعملك الكهربا بجانب الكنبة ,,, متجيش تحط الكنبه تلاقي الكهربا ورا الكنبه … يبقي انتا كدة بتداري على الكهربا بتاعتك ,,,فالفرش مهم جدا في توزيع الكهربا بتاعتك ,,,, مهم جدا تعرف برضه اماكن كل حاجه ف المطبخ ,,, مكان البوتجاز مثلا لو فيه شفاط …
هتعمل جيبسم بورد وفيه سبوتات ؟؟ لازم تحددله من الاول ..عشان لازم ترميله خرطوم فوق للسبوتات في عملية التأسيس منعا للتكسير لاحقا
فكل حاجه هتتحط في الفرش لازم يكون متحدد اماكنها بالظبط عشان تلاقي ان الكهرباء باينة وتقدر تستخدمها بعد الفرش ,,,
التكييفات كمان ,, لان التكييفات فيه منها بيطلعلها الكهربا عند الكباس بره وفيه عند الوحدة اللى بتتعلق جوة الشقه ….. على حسب رأي فني التكييف
……………………………………………………….
الكهربائي ممكن يشتغل مع السباك بحيث ميعارضوش بعض ف اماكن الشغل ,
يالا نبدأ :
هيجيلك الكهربائي ويعرف منك التفاصيل كلها
وتبدأ في مرحلة شراء الخامات اللي هيطلبها منك ,, خلي بالك ان خامات الكهرباء مكلفة
هتروح تجيبها ؟؟ طب إجيبها منين ؟؟
بص يا سيدي الفاضل ,, لازم تشتري حاجتك من محل موثوق منه لأن حاجات الكهرباء وبالذات السلوك بيكون فيها لعب كتيير ,,, والسلك مبيكونش أصلي وبيكون مضروب ودة اللي بيعمل مشاكل فيما بعد ,,,
* الكهربا عباره عن شبكة مربوطة ببعض ومتوصلة بلوحة رئيسية اللى فيها المفاتيح الكتير ديه ,,,, ( علب وخراطيم بتوصل بينهم وسلك بيمشي جوة الخراطيم لحد اللوحه الرئيسية )
الكهربائي بيبدأ في التكسير عشان يثبت علب الكهرباء وبعد كدة بيمد الخراطيم ويبدأ يعمل شبكة بين العلب وبعضها ويشد سلك بينهم ,,, ويجمع اللوحة ويركبلك مفاتيح اللوحة الرئيسية ,,,, تمام كدة ؟؟
ويعملك مخرج سلك بس في اي مكان محتاج سلك فقط زي مراية الحمام وشفاط البوتجاز والاباليك ولو هتعمل اناره خفيه ,,,
هيكلمك ويقولك تعالي يا استاذنا استلم ..
حضرتك هتكون رايح ف الطريق مش عارف هتستلم منه إيه ؟؟ ..احنا هنقولك
1 ) لازم تتأكد ان العلب السفلية كلها على نفس المستوي ولو حتي بالعين ,,, لازم تكون متابعه وهو شغال انه بيتأكد وبيظبطهم .. مش بيثبت كدة وخلاص وانه بيمسك على كل علبة ميزان المياه ويوزنها ,,, ليه بقي ؟؟ عشان لو فيه علبتين جنب بعض ,,, وهتيجي تركب الوش الخارجي بتاعهم … هتلاقي واحد مايل عن التاني ,,, وهتبقي شكلها مش لطيف ,,
2 ) لازم تتأكد انه وزعلك الاضاءه زي مانتا عايز ,,, المفتاح الفلاني بينور كذه ,,,
3 ) تتأكد ان العلب والخراطيم مش بارزة عن المحاره القديمة ومتثبته كويس عشان لما تجيب مبيض محاره لما ييجي يعمل المرمات مكن التكسير متلاقيش الخرطوم بيدايقه لانه بارز عن الحيطة ,,, لو هتشتغل كهربا في شقة طوب احمر ,, بنخلي مبيض المحاره يعمل حاجه اسمها بؤج ” البؤج ديه عباره عن مستطيل بيتعمل من خليط من المونه بنعملها عشان نظبط بيها ان الحيطة كلها تطلع متساوية ,, وهو بيظبط وش العلبة مع وش البؤجه
وبعد كدة لما يخلص الكهربائي ,,مبيض المحاره يدخل يشتغل وبكدة العلب مش هتكون بارزه لاننا اشتغلنا على البؤج اللى هو عاملها ,,,,,
4 ) علب المطبخ والحمامات متثبتهاش ,,, ليه بقي ؟؟ عشان تعرف تحركها براحتك لو قابلت بلاطة ديكور و انتا بتركبها ,,,
5 ) مناسيب علب الكهربا الكهربائي بيكون عارفها بس لازم تأكد وراه
,,, ومنسوبها هو عباره عن ارتفاعها من الارضية ,,, طب الارضية مش موجودة ,,, بس الشرب موجود واتكلمنا عليه في البوست السابق ,,,لو الشرب على 1 م من الارضية , والعلبه على 30 سم من الارضية , يبقي لما تقيس من الشرب للعلبة يديك الفرق بينهم اللى هوا 70 سم …
**المفاتيح منسوبها 90 سم من الارضية
**البرايز السفلية 30 سم من الارضية
**الاباليك 180 سم من الارضية
**برايز ومفاتيح المطابخ والحمامات 120 سم من الارضية
سلك التكييفات يفضل يكون 6 مم حتي لو قدرته قليلة
سلك برايز القوي 4 مم او 6 مم
البرايز والمفاتيح 3 مم
السبوتات 1.5 او 2 مم
6 ) تتأكد من اماكن الدش والتليفونات والبرايز والمفاتيح زي ما قولتله بالظبط 😃
لازم تتأكد من الاسعار وانتا بتشتري وتسأل عليها في كذة مكان وتتأكد ان السلك عنده سليم فلازم لما تجيبه توريه للكهربائي عشان يتأكدلك منه 🙂
المصنعيات :
فيه طريقتين ,,,
الاولي … ان الكهربائي هييجي يقولك انا هاخد الشقه مقطوعية ب كذة ,, طبعا حضرتك هتاخد منه الرقه اللي قاله وتسأل ناس عندها نفس مساحة شقتك وتسألهم تقريبا المصنعية اتكلفت كام ,, وفي الحالة ديه هو مسئول انه يعملك اي طلب انتا عايزه ف الكهربا
الطريقة التانية ,,, باللقمة ,,, البريزة تعتبر لقمه ,, المفتاح يعتبر لقمه ,,, واللقمه سعرها متغير من فني للتاني
مخرج السماعه اغلي من السبوت ,,, تركيب اللوحة من 500 لحد 1000 على حسب مساحة اللوحه 🙂 ,,,
ديه اسعار تقريبيه وبتختلف من مكان لمكان ولازم يتعمل معاينه للمكان عشان يتحدد السعر مظبوط 🙂
ملحوظات :
لو هتعمل بانوهات فيوتك في الحوائط لازم تقول للكهربائي عشان متلاقيش البانوه جاي ف علب الكهربا
لو هتركب جاكوزي لازم تعرف الكهربائي عشان يعملك مخرج الكهربا بتاعه ومينساش فردة السلك الارضي ,,, وفايدة الفرده ديه ان لو فيه كهربا اتسربت للجاكوزي وشخص موجود فيه … الكهربا مش هتوصله 🙂 لانه بيكون متوصل بسيخ حديد موجود ف مكان ما تحت ف التربة ..فالكهربا هتتسرب للحديد قبل جسم الانسان وكذلك في برايز الجهد العالي فاالمطبخ والحمامات ,,,,
الخلاصة : الكهربا لازم تتعمل صح وبخامات نضيفة ومتينه ,,, ومتبخلش فيها عشان تحمي ولادك وأهلك من أي ضرر
لو عندك أي استفسار ياريت متترددش انك تسألنا واحنا هنجاوبك
