الدهانات من أهم البنود اللي بتدي جمال وروح للشقة ..
مبدأيا الدهانات ديه زي المزيكا ,,, ممكن تبقي مزيكا هاديه وتفصلك عن العالم وممكن تقلب شعبي ومهرجانات ,,,
وقبل ما نتكلمكم ف البند دة ,, لازم نقولكم على مرحلة مهمه جدا قبل ما نشتغل ف الدهانات … خلصنا سباكه وكهربا ؟؟ هنجيب حد يشتغل في ” مرمات المحاره ” وهيا اماكن التكسير في المحاره مكان السباك والكهربائي ,,, المرمات ديه فيه ناس بيستسهلوا وبيجيبوا اي مبيض محاره ويشتغل فيها بدون ما يراقبوه او يركزوا ف الفنيات اللى لازم تتم في المرمات ديه
بتجيب مبيض محاره كويس وبتجيبله أسمنت ورمل وبتوفرله المياه
وجركن مادة ” إيدبوند ” : ودة بيعلي خواص المونه اللى بيشتغل بيها المبيض بحيث انها تمسك في المحاره القديمة كويس وبنجيبه من اي شركة زي سيكا او كيماويات البناء الحديث
وسلك شبك : ودة بيتحط على وش اي مجموعة خراطيم بحيث المكان دة بيكون عرضه ان المحاره فيه تفصل بعد كدة وتشرخ ,,, فاحنا بنحطه ف الاماكن ديه عشان متفصلش 🙂
أقطع إيده لو لقيت جبس ف الموقع : ,,,,
الصنايعي هيقولك دة انا جايبه عشان المونه تمسك وتشد كدة وتبقي زي الفل ,,,
الجبس محرم ,,,, ممنوع ,,,, وخلي بالك بيقولوا عليه سكر 😉 روح يابني هاتلي شوية سكر وطبعا العميل وقتها ميعرفش يعني ايه سكر ,, بكررها تاني ,, الجبس ميدخلش الموقع في أي حالة من الاحوال ,,,
الجبس بيخلي المونه تشد بسرعه فينتج اكتر ,,, ودة غلط لانه مبيخليش المونه ” تتهوي كويس ” وتاخد راحتها ,,,, فبالوقت تبدأ تتشقق وتسبب شروخ وتنميلات ببعد ما تكون قربت تخلص الدهانات بتاعتك ,,,
مرمات المحاره مالهاش سعر محدد ,,,, المبيض بييجي يشوفها وبيقولك بتتكلف كام وغالبا بيعد هتاخد كام يومية منه ويزود عليها شوية وياخدها منك شيلة واحدة
……………………………………………………………………………………….
خلصنا المحاره ,,,
هتجيب نقاش وهييجي يبص على الموقع ,,, وهيقولك انا هنزلك اليوم الفلاني ويديك شوية خامات هتروح تشتريهاله ,,, يه هيا الخامات ديه بقي ؟؟
السيلر
معجون للحوائط
معجون للأسقف
صنفره
تيب
بلاستيك للبطانه
علب ألوان
التنفيذ : ” الشغل الصح ”
النقاش هيبدأ في تنظيف الجدران وبعد كدة هيسحب السيلر على الحوائط والاسقف ” السيلر دة بيقفل مسامات المحاره عشان متشربش المياه بتاعت المعجون
بيبدأ يسحب اول سكينة معجون بالعرض مثلا
وبعد كدة تاني سكينة معجون بالطول وبيحط علي المعجون لون عشان يفرق بين الطبقة الاولي والتانيه ,,,,
وسكينة المعجون التالتة بلون مختلف ويصنفر ,,,
المحاره لو مش كويسة ,,بتاخد معجون زيادة ودة مش بنحبذه بس في حالات معينه بنعمله لو فيه مشاكل ف المحاره وبنعمله بمعجون أشد
فيه ناس بيدوا سيلر تاني بعد المعجون وفيه لأ .. وديه مدارس .. والاتنين صح ,, بس السيلر بعد المعجون أفضل ..
وهيبدأ يسحب وش بلاستيك ,,..بيبطن بيه الحوائط ويفضل ان البطانه تكون قريبه من اللون اللى فعلا هيتعمل على الحوائط… عشان يعزل الحوائط ومتاخدش رطوبة من الجو وبكدة يبقي انتهي من فترة تأسيس الدهانات لأنه هيقف فترة لتركيب السيراميك وبعد كدة هيرجع يكمل في تشطيب الدهانات ,,,
ممكن تبدأ الدهانات بالكامل بعد السيراميك ,,, مش هتقول لأ بس السيراميك هيتبهدل جتي لو حطيت عليه كذة طبقة كرتون
وبعد مالسيراميك ينتهي ينزل النقاش يكمل شغله ,,,
يبدأ يشوف حالة الحوائط ويظبط أي خبطات حصلت من صنايعية السيراميك بالمعجون ويصنفرها كويس وينضف الحوائط من الاتربه ويبدأ في مراحل الدهانات الاخيره وهيا التشطيب ,,
هتبدأ حضرتك كعميل تروح أي مكان بيبيع ألوان الدهانات ,, عندك مثلا :
جوتن , سكيب , سايبس , الجزيره وفيه شركات تانيه كتير طلعت جديدة زي نوفوكيم
وهتبدأ تختار ألوان كل حجره والفني في المعرض هيبدأ يعرض عليك أنواع دهانات مختلفه غير البلاستيك العادي زي :
البيرل والفيلفيد والسبونج والقطيفه والترخيم والاستوكا انتيكا وأنواع تانيه كتير وتبدأ تختار وتعيش جو الانتريور ديزاينر بتاع بيتك , بس خلي بالك ان اي دهانات غير البلاستيك بتكون ليها حساب اخر مع الصنايعي :))
وهتختار درجة اللمعان : هل عايز الالوان مط وديه بدون لمعه ,,, والنص لامع ,,, واللامع
ويفضل المط لو عندك المحاره فيها مطبات صعب تتعالج ..لأان اللامع لو فيه مطب في الحوائط ,, هيعملك ضي في الحيطان وهتحس ان الحيطة فيها اماكن بدرج اغمق
ستوب هنا بقي :
هتجيب عينات من كل لون ,, كيلو من كل لون ومتجيبش كميات الالوان كامله لان اللون ساعات بيختلف ,, دة غالبا بيختلف على الحيطة بدرجه اغمق ,,, والالوان مبترجعش ,, هتخلي النقاش يعملك عينات علي الحوائط وتتأكد ان الالوان مظبوطة .. وترجع تشتري الالوان بتاعتك بالكميات المطلوبة ,
وتحتفظ بأرقام الدهانات لانك ممكن … غالبا هتحتاجها في يوم من الايام لو ابنك او بنتك طلعوا الفن اللى جواهم على الحيطان ,,,, 🙂
متوفرش وتخلي النقاش يعملك اللون على ايدك لأن الصبغه بتاعته هتكون مختلفه تماما عن الكمبيوتر ولو جيت تجدد بيتك مش هتعرف تظبط نفس اللون وقتها 🙂
الاستلام :
عينك لازم تكون على النقاش باستمرار وانه بيصنفر كويس وفعلا عمل 3 طبقات معجون ,, هتعرف لان كل طبقة لازم تكون بلون مختلف عن اللي قبلها 😉
بعد ما يبطن لازم تمشي ايدك على الحيطان وتحس بنعومتها …
التركه بقي اللي الدهانات : استلم منه علي الاضاءه النهاريه واستلم منه بالليل لما تنور الشقه ,,, حطله في كل مخرج اناره لمبة 😉
ببساطة لان الاضاءه لما بتضرب على الحوائط والاسقف بتكشف أي عيوب في الحوائط
لو عملت جيبسم بورد ,, بياخد نفس المراحل بس نوع السيلر العازل بيختلف عن السيلرالعادي ,, بتجيبه ” باتريك سيلر ” والصنايعي هيقولك علىه باترننج سيلر 😉
ملحوظة : الابواب يفضل تركبها بعد السيراميك بحلقها ,,, ومتركبش الحلوق قبل السيراميك
والالوميتال يفضل تركبه بعد اول وش لون مع الابواب 🙂 ومعاهم شاسيهات ولقم الكهربا وأي ديكورات خشبية تركب ,,, ولو هتكرب كرانيش جاهزة ,, تركبها ,,,
لأن النقاش هيحتاج يقفل عليهم
لازم تستلم من النقاش أول بأول …. ومتستهونش أبدا بالبند دة لان دة خلاص الشكل النهائي للشقه عند 🙂
وخلي بالك من نضافة السيراميك لازم تكون فارش الارض كرتون كويس ومشمع ان امكن وتتأكد ان النقاش مركب تيب على الالوميتال والابواب ومركب تيب على وزر السيراميك وشاسيهات الكهربا ولو فيه سبوتات يتيبها ,,, وهات للنجار ستريتش يغلف بيه الابواب ….
وخلي بالك ان أي مخرج اضاءه لازم تركب فيه دواية ولمبة على الاقل ولو فيه سبوتات تركب قبل مالنقاش يخلص عشان متتفاجئش بالعيوب اللى بتظهر بعد الاضاءه ما تركب 🙂
بند السباكة يعتبر من أهم البنود اللي لازم تتأسس صح، لأن أي غلطه في البند ده هتعملك مشاكل كتير بعد كدا.
بس قبل ما ندخل في تفاصيل البند ده، هنتكلم عن حاجه مهمه جدا إسمها ” الشرب ” .. الشرب دا علامة بتكون علي مسافة 1 متر من التشطيب والرمز بتاع الشرب بيكون مثلث مقلوب، وفايدة الشرب إنك بتعرف تحدد مسافة كل حاجه من مستوي تشطيب أرضيتك سواء سيراميك أو بورسلين، زي علب الكهربا السفلية والعلوية ودي لازم كلها تكون علي نفس المستوي، مينفعش يكون فيه علبه عاليه وعلبه واطيه.
طيب لسه الشقة بتاعتي مش متشطبة هحدد الشرب دا ازاي؟ المفروض إن تشطيب أرضية المدخل قدام باب الشقه تكون على نفس مستوي تشطيب أرضية الشقة، ف هنقيس مسافة 1 متر من تشطيب الأرضية ونعمل الشرب والسباك بينقله جوا الشقة بميزان الخرطوم.
– طيب إيه هو ميزان الخرطوم وبنستخدمه ازاي؟
دا عباره عن خرطوم رفيع بيكون فيه مايه، واحد بيمسك ناحيه ويثبتها عند الشرب اللي عملناه قدام باب الشقة، وواحد بيبدأ يثبت الخرطوم علي حيطه جوه الشقة، لحد ما مستوي المياه يقف على الشرب اللي بره عند باب الشقه، في الوقت دا مستوي المياه ف الخرطوم بره وجوة بيكون على نفس المستوي، بكدا نكون حددنا الشرب، نبدأ بقي …
– السباك لما يدخل الشقة بيكون محتاج يعرف منك كذا حاجه زي:
- هتحط القاعدة فين ؟
- هتحط الحوض فين ؟
- هتعمل حوض بركبة ولا بعمود ولا حوض ساقط رخامة ؟
- هتركب سيفون دفن ولا عادي ؟
- هتعمل شطاف بارد بس ولا بارد وساخن ؟
- هتعمل شاور ولا بانيو ؟
- أماكن التكييف هتكون فين ؟ لأن التكييف بيكون ليه صرف داخلي في الشقة.
نيجي للخامات :
– بالنسبة لمواسير التغذية المايه فيها بتمشي تحت ضغط، وزمان كانوا بيعملوها من الزهر لكن دلوقتي بنستخدم مواسير بولي بروبلين، وأغلب الموجود منها في مصر خامات مستوردة والمواسير دي بتسحمل ضغط المياه وطول الماسوره بيكون 4 متر.
هيبدأ السباك يكسر ويعمل مسار لمواسير التغذية ويركب المواسير ويخلص شبكة التغذية كاملة وبعد كدا ينضف الأرضية كويس جدا من بواقي التكسير، بعد ما السباك بيخلص لازم نختبر المواسير عشان مكتشفش بعد ما أسكن إن فيه تسريب، واختبار الضغط بيتم كالآتي:
أطبب كل الفتحات ما عدا مخرج واحد ده اللي هدخل منه المكنه وأقعد أكبس وكل ما أكبس العداد اللي عندي بيقرأ ضغط المياه في الماسورة بوحدة البار، والمايه عادة بتكون ماشيه في المواسير بضغط 7 بار، عشان كدا لما نيجي نختبر بنختبر بـ 10 بار، وأسيب الضغط ده شغال لمدة نص ساعة لو مفيش عندي أي تسريب يبقي المواسير دي زي الفل ومش هيحصل فيها تسريب بعد كدا، واللي بيعمل الاختبار ده مندوب من الشركة، وبعد الاختبار بيديلك شهادة ضمان مدي الحياة.
– وبالنسبة لمواسير الصرف بنعملها من خامة اسمها U-PVC، وأشهر الماركات في مواسير الصرف ( الشريف – الحجاز)، والمواسير دي مبتتحملش الضغط، لأن المايه فيها بتمشي مع الجاذبية، وطول الماسوره بيكون 6 متر. هيبدأ السباك يركبها مع مواسير صرف التكييفات، وبعد ما يخلص ” يحبش ” عليها بمونه عشان يحميها إن حد يدوس عليها لأنها بتكون مظبوطة بميل معين.
– بالنسبة للصيني ( القاعدة – الحوض ..الخ) أفضل ماركات فيها (إيديل – ديورافيت).
– بالنسبة للنواكل ( الخلاطات – والحنفيات – الاكسسوارات .. الخ) أفضل الماركات (جروهي – جاكوب).
– أفضل طريقة لفرش الحمام :
- البيبة لازم تكون في أحد أركان الحمام ويضل تكون جمب القاعدة، بلاش في النص خاالص.
- الحوض : أحطه في أقرب نقطة للباب.
- القاعدة: تكون تحت الشباك عشان الصرف بتاعها يكون سهل.
- الغساله لو هنحطها في الحمام ممكن نحطها تحت السخان.
– ملاحظات أخيرة:
- مستوي مخرج صرف التكييف في الحائط لازم يكون خلف وحدة التكييف شمال التكييف والحاجة الأهم إنك لازم تعمل حساب سقوط الجيبسم بورد ان وجد، والتكييف بيحتاج تقريبا من 35-40 سم تحت سقف الجيبسم بورد
- متديش السباك كل حسابه إلا لما يخلص خالص، ويفضل اللي هيأسس هو اللي يشطب.
